Public Sector Organizations and Leaders
Leitung ah kipawlna tampi om hi. A telnop-pen dingin, tua kipawlnate nampi ni-in kikhen thei hi. Tuate in Profit Organizations le Nonprofit Organizations-te ahi hi. Profit Organizations-te pen summet nga thei nadinga kipawl-tonna organizations-te ahi hi. Gentena-in, mi nih le thum kipawl tonin annsai khat a hon vule, amateng in Profit Oriented kipawlna a nei vuhi hi. Tuhun company tampi-te in, mi tampi tah kithu tuohna tawh kipawl a, tuate zong Profit Organizations kici hi; Walmart, McDonald, Bank of America, Adidas cite Profit Organizations ahi hi.
Nonprofit Organization ici ciengin, summet nga nading hi lo a mipi, gam, le leitang phattuom nadinga kipawlnate ahi hi. Gentena-in, kumpi nasep, biehna lam kipawlna, mipi cidam nading, mipi gilkiel dangta lo nading, singkung lopa cidam nading kipawlnate Nonprofit Organization kici hi. Profit Organization pen Private Sector Organization zong kici a, Nonprofit Organization pen Public Sector Organization kici hi. Tuni-in Public Sector Organization thu i kikum nuom hi.
Public Sector Organization-te’n mipi phattuom nading le mipi bulphu kipawlna hi a, a zahtah huoi mama kipawlna-te ahi hi. Tua ma bangin, Public Sector Organization khat in mipi phattuom nading a bawl sih a, mipi phattuom nading a bawl nop sih leh, ahi sihle a bawl thei sih leh, tua kipawlna a om nading a thu om lo hi.
Mipi phattuom nadinga kiphut kipawlna in mipi phattuom nading a bawl sih leh, tua in mipi a susie kipawlna ahi hi. Mipi ading bangma sem loin, mipi min tawh kipawlna om thei lo hi.
Gentena-in ‘American Cancer Society’ in America gam sungah cancer ngate damna a nga thei nading leh cancer dam nading zatuite kanna (research) tawh cancer natna neite adingin phattuomna ka bawl ding hi ci mission statement tawh Nonprofit Organization hi theina a nga ahi hi. Tua kipawlna in cancer neite ading phattuomna a bawl sih leh, tua kipawlna in a mawhna ahi hi.
Gensa mabangin, Public Sector Organization-te’n mipi bulphu a, a zahtah huoi mama kipawlna-te ahi hi. Tua kipawlnate in mipi ading a om kipawlna ahi mabangin, tua kipawlnate ah makai, panmun nei leh, nasem mimalte zong mipi ading a om ahi vuhi.
Amate’ panmun in ‘serving the public’ hi a, mipi’ sila ahi vuhi. Mipi in amate i Boss ahi hi. Gentena-in, gam uh kumpi le panmun neite in zahtah huoi mama hi. Ahi zongin mipi ading phattuomna bawl panmun ahi ziehin zahtah huoi beh hi.
Tua ziehin amate’n, mipi tungah tavuon gol mama a nei vuhi. Amate dei bangin kipawlnate hei thei ziu-zieu lo vuhi. ASPA kici American Association of Public Administration in 1984 kum a kipan in a hun tawh kizui a, mipi makai leh nasemte zuiding thugui hun (code of ethics) na nei vuhi. 2014 kumin, Public Sector Organization ah makai le nasemte zuiding thuguihun (8) na koi vuhi.
1. Advance the Public Interest:
Mipi adinga nasem khat in ama phattuom nading sem lo dinga, mipi phattuom nading beh sem ding hi.
2. Uphold the Constitution and the Law:
Mipi ading nasem khat in a uh kumpite thuguihun le uhpadi-te zui ding hi.
3. Promote Democratic Participation:
Mipi ading nasem khat in kipawlna’ nasepnate mipi theisah dinga, kipawlna i mailam kalsuonna le khensatnate ah mipi tawh kikopin vaihawm ding hi.
4. Strengthen Social Equity:
Mipi ading nasem khat in mipi deidan loin nasem ding a, kipawlna sungah kideidanna om loin, khat le khat a kizahtah semsem nading zong hanciem ding hi.
5. Fully Inform and Advise:
Mipi ading nasem khat in mipi’ kitangsapnate kan lopi-in, bangma khensatna nei thei lo ding hi.
6. Demonstrate Personal Integrity:
Mipi ading nasem khat in mipi muon le suon hi thei nadingin thuman-thutah tawh nungta ding hi.
7. Promote Ethical Organizations:
Mipi ading nasem khat in kipawlna sungah citahna a op semsem nadingin hanciem ding hi.
8. Advance Professional Excellence:
Mipi ading nasem khat in panmun deina tawh makai sem loin, mipi ading pilna-siemna tawh kicingin na a semzo-penpente hizaw ding hi.
A tunga thu guihunte in, makai hoi le mipi nasem hoi suoh nading hi lo a, makai le mipi nasem khat ihi leh zui lo phamaw thute ahi hi. Mipi in zong a tunga gamtatnate tawh kituoh lo pholah ngam ding zong kisam hi.
