Tobit pen Israel mi Leilu-lam Kumpigam panin salin kimanin (722/721 B.C.) Nineveh ah a kipuohte lahah minuomsa le a kipumpieh mi khat ahi hi. Hun khatin a mit ang tawt ciengin, ama in Pasien’ kungah a hinna apin, si nading thu ngen hi. Ahi zongin lam gamla Media ah a sum koi ang thei ciengin, a tapa Tobiah sawlin tua sum a va lasah ta hi. Tuami hun laitahin, Media ah Sarah kici nu khat in zong si nading thu a nget laitah tawh kituo hi, bangzieh ahei cile ama in pasal sagi tenpi-in, a kiten ni zan sielin dawi gilo Asmodeus in thapieh sieng paipai hi. Pasien in Tobit le Sarah-te’ thungetna a za a, mihingin kilemin vantungmi Raphael sawlin ama tegel cingin a kemsah hi.
Tobiah tawh Media ah Raphel a zaw hi. Tigiris Gun ah a kisil laitahin ngapi in Tobiah a hapsawm ciengin, Raphael in a mat nadingin thu pie hi; ama in a sinkha, a lungtang, le a sin a lasah hi, bangzieh ahei cile tuate pen zatui-in kizang thei hi. Baakhat zo ciengin, Tobiah in Sarah a tenpi nadingin Raphael in thapieh hi. Ama in ngapi’ lungtang le a sin pen mopawi bawlna lupna inndan panin Asmodeus hawlkhietna in a zang hi. Nineveh ah kilekia-in zi khat le a pa’ sum gen ang tut hi. Tobiah in tua ngapi’ sinkha lain a pa’ mit a nupieh ciengin, a pa Tobit in mit khuo mu theikia hi. A tawpna ah Raphael in ama pen koi tahtah ahei ci ang kigenin vantung ah a kiletokia ta hi. Tua ciengin Tobit in phatna la ngai khat a sa hi. A si masangin, Tobit in a tapa’ kungah tam a gina lo khuo pen Pasien in susie ding ahi ziehin tam khuo pan a kihemkhiet nadingin a gen hi. Tobiah in a nu le a pa a vui zaw ciengin, ama le a innkuonpite tawh Media ah a pei ta hi. Tua munah ama in Nineveh khuo a kisuhsietna thu a za hi.
Tami laibu gielte in Esther le Judith laibute a kigiel danin a giel hi. Tuami in hilna le biehna lamah khanto nading deihna tawh gielna ahi hi. Nidanglai tangthute, kumpite’ min, le khuopite’ min zong a kizanga, a simnophuoi ding le a lungluthuoi ding beha kizang hi loin, a hoi lote lahna-in zong a kizang hi: tua pen a gina lote a kisuhsietna ahi hi.
Tobit Laibu pen tangthu laibute lahah a kikoi thei zel vangin, tangthu le pilna laibute kikalah koi leih kinai-in kilawmzaw hi. Tami laibu ah pilna laibute sunga kigiel dan tampite zong kimu thei hi (cf. Tobit 4:3-19; 12:6-10; 14:8,9), tua banah theilawm pilna tampite zong om hi: law (rule) tungah thumanna, thumna tawh kisai-in vantungmite’ nasepna, nu le pa zatahna, siengtho kitenna, misi zatahna, le piehkhietna, thungetna, le tannate’ manphatnate ahi hi. Tami laibu’ sungah Tobit pen Ahiqar’ sanggampa khat ahi hi. Ahiqar pen tanglai Nisuona lama laigielte le tangthute sungah a minthang mi thupi-in kigiel hi.
Tam laibu pen Aramaic hama kigiel masa hidingin kiumin, a kigiel masa pen kumzalom tampitah kimansuo ahi hi. 1952 kumin, Qumran Leihawm 4 sungah Aramaic hama kigiel laigiel li le Hebrew hama kigiel laigiel khat kimukhie-in, a kikhetzaw a sawt nai sih hi. A kimukhie laigielte le Codex Sinaticus sunga kimukhie Greek hama a sauzaw a kigiel Tobit (le mss. 319 le 910 kici cillai Tobit laibu ciemtena) kibang phielphiel hi. Codex Sinaiticus pen 1844 kuma St. Catherine’s Monastery (Mount Sinai) pana kimukhie pan ahi nabo hi. Tobit laibu dana Greek hama kigiel laigiel nite a na opzaw a sawt ta hi: a tomzaw pen, mss. Alexandrinus, Vaticanus, Venetus, le a sawi a kigielte ah kimu thei hi; a hoibep pen, mss. 44, 106, 170-te sungah kimu thei hi. Tobit Laibu pen Latin hama kigiel nam ni tawh mi tampite’n na thei hi: Vetus Latina tawh kigiel a sau pen ahi Greek hama kigiel a sauzaw pen tawh kinai-in, khat veivei Greek hama kigiel pen sangin Aramaic le Hebrew hama kigielte tawh a kinaizawna munte om hi; tuale a tomzaw pen Vulgate ahi a, tuami in Greek hama kigiel a tomzaw pen tawh kinai hi. Tu a Mikang ham tawh kigiel NAB pen Codex Sinaticus pana kibawl a tamzaw ahi a, tuami in Greek hama kigiel a kicingzaw pen khat ahi hi; hizongle mun nite (4:7-19b le 13:6i-10b) ah laiguol na kim lo sese hi, tuami in laiteina na subuoi zo tham hi. Tua ahi zieha, tua munte i tel thei nadingin Vetus Latina ahi sihle Greek hama kigiel a tomzaw pen tegel et ang ngaisah hi. Tua ahi tah ziehin, laiguol pawl khat pen Aramaic ahi sihle Hebrew ham pana kila pawl khat a om hi, tuate laha a khietna a kilamdang pawl khat a om hi. Tobit Laibu dana a kigiel pen tanglai Arabic, Armenian, Coptic (Sahidic), Ethiopic, le Syriac hamte-in na kitei hi, ahi zongin tamte pen Greek hama kigiel a tomzaw pen panle tei-sawnsawnte a tamzaw ahi hi. Tam laibu mun kuo-in kikhen thei hi:
I. Tobit’ Gimna Lienpi (1:3—3:6)
II. Sarah’ Lungkhamna (3:7-17)
III. Khuolzin Ding Kithawina (4:1—6:1)
IV. Media ah Tobiah’ Khuolzinna (6:2-18)
V. Kitenna le Sarah’ Damna (7:1—9:6)
VI. Nineveh ah Tobiah’ Kilekiana le Tobit’ Damna (10:1—11:18)
VII. Raphael’ Kigenna (12:1-22)
VIII. Tobit’ Phatna La (13:1-18)
IX. Thukhupna (14:1-15)