VI. NINEVEH AH TOBIAH’ KILEKIANA LE TOBIT’ DAMNA
Tun le Zuo’ Lunghimawna.
1 Tuami hun laitahin, Tobit in Tobiah’ khuolzinna le a kilekia nading ni bangza sawt ding ci, nikhat zaw nikhat, a simsim hi. A ni cing zo ta a, a tapa’ mai a mu lo ciengin, 2 ama in, “Tua munah ama a kiman ahi kha diei aw? Ahi sihle Gabael si-in, ama sum pie ding koima om nawn lo ahi diei aw?” ci hi. 3 Tua ciengin ama a da mama hi. 4 A zi Anna in, “Ka tapa mangthangin, a nuntate lahah om nawn lo hi!” ci hi. Tua ciengin, gingin ama a kapin, 5 “Aw, ka mit ading khuovah ka tano, khuol kang zinsah lawmlawm!” ci-in a awng hi. 6 Ahi zongin Tobit in: “Kap nawn sinlen, lunghimaw sin, ka sanggamnu aw; ama bagnma ci lo hi! Tua munah ama ni in lamet lo thu khat tuoh hi kha ding hi. Ama tawh a zintonpa in mi muonhuoi i sangte khat ahi hi. Tuaci’n ama ziehin da sin, ka sanggamnu aw. A sawt loin tam munah hing tung ding hi,” ci-in a gen hi. 7 Ahi zongin ama in, “Ham sinlen, ei sol sawm sin! Ka tapa a mangthai ta hi!” ci-n khauh thain a dawng hi. Nisimin ama pusuoin, a tapa’ khuolzinna lampi a en hi. Ama in bangma a ne sih hi. Ni a tum ciengin, a innah peikia a, zan tungtawng kimu loin awngin a kap hi.
Ecbatana pan Peikhietna.
Tu-in Raguel in ni sawm le ni li sung bawl dinga a kamciemsa a tanu’ mopawi a ni a cin ciengin, a kungah Tobiah pei-in: Tu’n ei peisah ta in, bangzieh ahei cile ka nu le ka pa in ei mukia dingin kilamen nawn lo ci thu ka thei hi. Tua ahi ziehin kang thum hi, ka pa aw, ka pa kungah ei peisahkia ta in. Ama ka nuasie-dan kang gensa ahi hi,” a ci hi. 8 Raguel in Tobiah kungah: “Om lai in, ka ta aw, kei tawh hing om lai in. Na pa Tobit kungah kamtai ka sawl dinga, amahaw in na thu a gen ding vuhi,” a ci hi. 9 Ahi zongin, “Hi lo hi, ka pa kungah nei peisah nadingin kang thum hi,” ci-in ngen teitei hi.
10 Tua ciengin Raguel in Tobiah tungah a zi Sarah apin, a neisa zosie: sila pasalte le numeite, bawngtalte le tuute, late le kalaohte, nihten puonsil, sum le pai, le innsung vanzahte lah pan a langta a pie hi. 11 Ama in hoitahin a vaihlah hi. Ama in Tobiah kawi-in a kungah: “Dam in, ka ta aw. Na khuolzinna ah na lamzang vun. Vantung Topa in nang le na zi Sarah tungah lawcinna hing pie ta heh. Tuale ka si masangin na tate ei musah ta heh!” ci hi. 12 Tua ciengin ama in a tanu Sarah kungah, “Ka tanu aw, na innpipa le na innpina zatah in, azieh pen tu akipanin amate in na pienna na nu le na pa ma ahi ta hi. Lungnuomin pei in, ka ta aw; Ka hinlaisie na thu hoi ka za nuom hi,” ci-in a gen hi. A tawpna ah amahaw mangpha paihin, a peisah ta hi.
Edna in zong Tobiah kungah: “Ka it ka sanggam le ka tapa aw, Topa in dam-le-bihin hing tungsah hinlen, ka si masangin nang le ka tanu Sarah’ tate ka mu dongin ei hingsah ta heh. Topa’ muna ah, ka tanu kang ap hi. Na hin sung tawntungin, ama na dasah sin. Lungnuomin pei in, ka ta aw. Tu akipanin kei pen na nu ka hi a, Sarah pen na sanggamnu ahi ta hi. I hin sung tawntungin, a kibangin Topa in ei lawcingsah ta heh,” a ci hi. Ama in ama ni namin, a vaihlah hi.
13 A khuolzinna ah lawcing ahi ziehin na Tobiah in zosiete’ Kumpipa, vantung le leitung’ Topa phat kawmin lungdamna le kipahna tawh Raguel kung panin a peikhie hi. A tawpna ah ama in Raguel le a zi Edna thupha pie-in, “Na hin sung tawntungin hing zatah dingin Topa in kei thu ei pie zo hi!” ci-in a belap hi.