1 Tua ciengin Tobit hamin lungdam phatna la khat a phuo hi; ama in tam bangin a ci hi:
“a hing tawntung Pasien’ tungah thupha om ta heh,
azieh pen ama’ uhna a kip tawntung hi.
2 Ama in gimna pie-in, hepina zong a lah hi,
Hades dong ciengah khiesuhin,
Guom thu mama panin a lato hi.
Ama’ khut sung panin bang in lakhie zo ding ahei?
3 Minam zosie’ muna-ah, Israel-te aw,
ama tungah lungdamko vun,
bangzieh ahei cile minam zosie lahah
ama in note ang kithethangsah zongin
4 tua munah ama’ hoina tangko vun.
Hinna nei zosie’ mai ah ama phat vun,
azieh pen ama in note’ Topa ahi a,
ama in note’ Pasien hi-in,
i Pa le tawntung Pasien zong ahi hi!
5 Ama in na gamtatkhielnate ziehvun gimna hing pie dinga,
ahi zongin note tungah hepina hing nei ding hi.
Ama in na kithethangna gam zosie panin
hing kaikhawm ding hi.c
6 Na lungsim zosie le na hla zosie vutawh
ama’ lam na kiheikia ciengvun,
ama’ muna ah na hoi sem vun,
Tua hile ama in no’ lam nga-in,
note' kung panin a mai a sel ngai nawn sih ding hi.
Tu-in note’ tungah ama’ sepsate lungngai vunlen,
na awneiza vutawh lungdamko vun.
Citahna Topa phat vunlen,
khang zosie’ Kumpipa pahtawi vun.
Ei kimatna leitang ah lungdam ka kohi,
tuale mawna tawh kidim gamte ah
ama’ vanglietna le thuneina ka tangko hi.
Na lungsim vutawh kituoin, ama’ muna ah na hoi sem vun:
tua hile mawmaisahna na ngakha ding vuhi.
7 Ke’n ka hi leh, ka Pasien ka phat a,
ka hla in vantung Kumpipa phatin,
ka hin sung tawntungin ka lungdam hi.
Ama’ hoina tungah mi zosie in phatna la sa hinlen,
8 Jerusalem ah mi zosie in pulahin lungdamko ta vuheh.
9 Khuopi siengtho Jerusalem aw,
ama in na khut tung vante ziehin gimna hing thuosah dinga,
ahi zongin ama in a citah mite a hepikia ding hi.e
10 Citahna tawh Topa tungah lungdamko vunlen,
khang zosie’ Kumpipa phat vun,
tua hile na sungah nopna tawh na peihbuhte
a kilamkia ding hi.
Ama in a kiman zosiete na sungah nopna pie ta heh;
ama in hing tung ding khang zosie adingin
a lungkham zosiete na sungah muonna pie ta heh.
11 Leimong dongah khuovah khat a tang ding hi.
A gamlapi panin minam tampite in hing zuon ding hi,
Tuale na min siengtho tungah leimong donga teng zosie in
vantung Kumpipa adingin khutsuote hing tawi ding vuhi.
Na sungah khang khat zaw khang khat in
lungdam biehpiehna a nei ding vuhi;
na min a lien tawntung ding hi.
12 Ang simmaw le ang deih lo zosiete’ tungah samsietna om ta heh;
ang muda le ang kosie zosiete’ tungah samsietna om ta heh;
ang suhsie le na kulpite a suhsie zosiete’ tungah
samsietna om ta heh,
Tuale na tausangte khule-in,
na inn a haltum zosiete’ tungah samsietna om ta heh.
Ahi zongin ang zatah mi zosiete’ tungah
tawntung thupha om ta heh.
13 Tuaci’n pei-in, a citah mite’ tungah lungdamin kipah in,
azieh pen amate a kisuhtuo ding vua,
tuale khang zosie’ Topa a phat ding vuhi.
14 Ang it mite in nopna a nga ding vua,
nangma’ kilemna sungah a lungdamte in
nopna a nga ding vuhi.
Na gimthuona zieha a date in zong nopna a nga ding vuhi,
Bangzieh ahei cile amate in na tungah lungdamin,
a tawntungin a kipah ding vuhi.
15 Ka hla aw, vanglien Kumpi Topa phat in;
16 bangzieh ahei cile Jersualem pen
tawntung ama’ inn bangin a lamkia ding hi.
Vantung Kumpipa tungah lungdamko ding le
na vanglietna mu dingin,
ka hlah ka suon themkhat beh hing leh,
kei zong ka lungdam ding hi!
Jerusalem’ kotpite pen sapphire le
emerald suongmanphate tawh a kilam dinga,
na kulpite zong suongmanpha tawh a kilam ding hi.
Jerusalem’ tausangte zong kham tawh kilam danga,
gal panna munte zong kham siengpen tawh a kilam ding hi.
17 Jerusalem’ lampite ah
ruby le Ophir suongmante a kipha ding hi;
18 Jerusalem’ kopite in nopna lapite sain,
a inn zosie in Hallelujah! ci’n a kiko ding vuhi.
Khang zosie adingin Israel-te’ Pasien tungah
thupha om ta heh!
Azieh pen na sungah thuphanga mite in
min siengtho a phat tawntung ding vuhi.”