IX. THUKHUPNA
Kikhenkuon Thuvaihlahna.
1 Tua ciengin Tobit’ phatna lapi a tawp ta hi. Kum za le sawm-le-ni a pha ciengin, nuomtahin si-in, Nineveh ah zatahna tawh a kivui hi. 2 Kum sawmnga le kum giet a pha-in, khuo mu nawn lo a, khuo hing mukia ciengin, ama nuomtahin hingin, piehkhietna a nei hi; ama in Pasien gingin, a siengtho Thuneipa’ tungah lungdam a kosuo hi.
3 A si kuon ciengin, ama in a tapa Tobiah le Tobiah’ tapa sagite hlanin, “Ka ta aw, na tate zawpi-in,a 4 Media ah tai in, azieh pen Nineveh kisuhsiet ding, Nahum’ tangko Pasien’ kammal ka um hi. Tua thute zosie Assyria le Nineveh-te’ tungah a pieng ding hi; Pasien’ sawl Israel’ kamsangte’ gen zosie hing tangtung ding hi. Amate’ gen kammal khat zong a tangtung lo a om sih ding hi, hizongle na zosie a kise hunin a pieng ding hi. Tuaci’n Assyria le Babylon sangin Media pen a zauhuoilazaw ding hi. Bangzieh ahei cile Pasien’ gente a pieng ding ci thei-in ka um hi. A pieng tahpi ding hi, tuale a kigenkholsa kammalte khat zong a pel sih ding hi.
Israel leitanga teng i sanggamte ahi leh, gam hoi pan amate kithethangin a kiman ding vuhi. Israel leitang zosie sehnel gam a suo ding hi; Samaria le Jerusalem zong sehnel gam a suo ding! Hun khat sung, Pasien’ innpi hawmsuo dinga, a kihaltum ding hi. 5 Ahi vangin Pasien amate hepikia-in Israel leitunagah a zawpikia ding hi. Amate in innpi a lamkia dingvua, a kisekholsa hunte a tun masangsie, a masa pen a bang sih ding hi. Tuazo ciengin amate in a saltanna mun panin kilekia-in, zatahna tawh Jerusalem a lamkia ding vuhi. Israel-te’ kamsangte’ gen ma bangin, tua sungah Pasien’ innpi kilamkia ding hi. 6 Minam zosiete in thuman thutah sungah Pasien’ lam nga-in zatahna a pie ding vuhi; mi zosie in lam a pielsah milimte a paimang ding vuhi. 7 Citahna sungah khang zosie’ Pasien a phat ding vuhi. Tua hun cienga a kihonkhie ding Pasien a phaw tawntung Israel-te zosie kisuhtuoin, Jerusalem hing zuon ding vuhi; lungmuongin, amate’ tunga a kipie ding Abramham’ leitang ah a teng tawntung ding vuhi. Lungsim tahpi tawh Pasien a itte a nuom ding vua, hizongle mawna bawlin gamtat hoi lote, tua leitang panin a maithai ding vuhi.
8,9 Tu-in, ka tate aw, tam bangin thu kang pie hi: lungsim tahpi tawh Pasien’ na sem vunlen, ama’ muna-ah a lungnophuoite bawl vun; na hoi sem ding, piehkhietna nei ding, Pasien a thei tawntung ding, le lungsim tahpi le thatang zosie tawh ama’ min phat den dingin na tate thuhil vun. Tu-in, nang na hi leh, ka ta aw, Nineveh nuasie ta in; tam munah om nawn sin. 10 Ka gei ah na nu’ luong nang vui ni akipan, tam khuo ah zan khat zong na teng nawn sin. Azieh pen tam khuo sunga om mite in maizumna nei loin, zuou gamtat vua, a gitnat lona vuh tampite ka mu hi. Ka ta aw, Nadin in a ma a kempa Ahiqar tungah a bawlte en in. A hingtangin leisungah Ahiqar kiphum hi lo amah? Ahi zongin Nadin’ bawl a maizumhuoi mawna pen ama’ tung ma ah Pasien a tungsah hi. Khuovah sungah Ahiqar thokia a, Nadin ahi leh tawntung khuomiel sungah a pei hi, azieh pen ama in Ahiqar pen tha ding a sawm hi. Ahiqar in piehkhietna tampei nei ahi ziehin, si thei nading Nadin’ thangsie panin a suo ta hi. Nadin ahi leh ama’ siesa thangah ama awhin, tuami in ama a suhsie hi. 11 Tuaci’n, ka tate aw, piehkhietna in bang sema, gitnat lona in bang sem ahei ci thei in—gitnat lona in sina hi. Tu-in ka hla in ei nuasie ding ahi ta hi,” ci-in thu a pie hi.
Tobit le Tobiah’ Sina.
A lupna tungah a lumsah vua, ama a si ta hi; tuale zatahna tawh ama a vui vuhi. 12 Tobiah’ nu a si ciengin, ama in a pa’ gei ah a vui hi. Tuazo ciengin a zi le a tate tawh, a sungpa Raguel tawh a tenna mun vuh ahi Media gam Ecbatana khuo ah a pei vuhi. 13 Ama in a kumham a sungpa le a sungnu zatahtahin kem hi; tuale ama in Media gam Ecbatana ah ama ni a vui hi. Tua ceingin ama in Raguel le a pa Tobit’ gamh a luo hi. 14 Kum za le sawm-le-sagi a phain, mi’ zatahhuoi mama khatin a si hi. 15 A si masangin, ama in Nineveh’ kisuhsietna thu a za hi. Ama in tua khuo sunga teng mite Media kumpipa Cyaxares in manin, Media ah a zawpina a mu hi. Nineveh-te le Assyria-te tungah Pasien’ nasepnate ziehin ama a phat hi. A si masangin Nineveh tungah lungdamin, tawntung Topa Pasien a phat hi.