1 Lunggim luo ka hi ziehin, tau-in a gingin ka kap hi. Hlitui tawh kitehin thu ka ngen hi:
Si Nading Tobit’ Thungetna
2 “Topa aw, nang pen na thuman a,
na gamtatna zosie a dih hi;
Na lampi in hepina le thumanna hi;
leitung thukhen nang na hi hi.
3 Tu-in Topa aw, ei mangngil loin,
deisahna mit tawh ei ensuh ta’n.
Ka pu ka pate’ tatkhielnate,
thei lopi a ka gamtatkhielnate, le
ka mawnate ziehin gimna ei thuosah sin.
Amate in na tungah hing maw-in,
4 na thukhamte a palsan vuhi.
Tuaci’n kote nei kithethangsahna minam zosie lahah
mi’ simmaw, mi’ thugente, le mi’ gen baang dingin
buluna, saltanna, le sina sungah nei koi hi.
5 Hi ma hi, ka pu ka pate’ mawna, le
keima' mawnate tungah na thukhenna tampite dihin, a kilawm hi.
Bangzieh ahei cile na thukhamte ka zui lo ban vuah,
na mai ah thumanna tawh ka kalsuon sih vuhi.
6 Tuaci’n tu-in ka tungah na lungkimna bangin hing vai hawm ta in;
ka hinna hu a kilahmang nadingin thu na pie ta in,
tua hile lei maitang tawh kikhenin leivui ka suo thei ding hi.
Ka hin sangin si leng kei adingin a hoizaw hi,
bangzieh ahei cile a kilawm lo simmawnate za-in,
ka sungah dana a lien mama hi.
Topa aw, tami lungkhamna tawh ka kipel nadingin thu na pie ta in;
keima’ tawntung tenna dingah ei peisah ta in;
Kinuahei-in ei elngat sin, Topa aw.
Bangzieh ahei cile simmawnate za-a lei gentheina tampi ka thuo sangin,
si leng kei adingin a hoizaw hi!”
II. SARAH’ LUNGKHAMNA
Sarah’ Kimawsietna.
7 Khum ni ma-in, Media gam Ecbatana khuo ah Raguel’ tanu Sarah in zong a pa’ silanu khat’ kosietna a thuo hi. 8 Bangzieh ahei cile ama in pasal sagi vei a nei ngai vangin, a zi tawh lumton man loin tua pasal sagite a banbanin dawi gilo Asmodeus in a that hi. Tua silanu in: “Na pasalte a that nangma na hi hi! En in! Pasal sagi vei na nei ta a, bangma khat beh na phattuompi sih hi. 9 Bangzieh a ko nei vuoh ahiei? Na pasalte a si zieh i? Pei inlen, amateng tawh zaw ta’n! Tua hile na hlah le suon zong ka mu nawn sih ding vuhi!” a ci hi.
10 Tua ni-in Sarah a lungkham mama hi. A pa’ inndan tungnung ah hlitui tawh ka toin, a kigui-awh sawm hi. Ahi vangin ama in ngaisun pha-in: “Hi lo hi! Mite’n ka pa’ kungah, ‘Na tanu it khat tang neisun in a lungkham ziehin a gui-awh ta hi,’ ci’n kosiet da vuheh. Tam ci maw leng, ka pa adingin mindaina khat ahi kha dinga, a tehnua a si a mankuonin dana pie ka hi kha ding hi. Ka kigui-awh a tua simmawnate ka thuo nawn lo sangin, Topa’ kungah si nading ngen a tua simmawnate ka thuo nawn lo ding nahpitahin a hoizaw hi,” a ci hi.
11 Khum hun ma-in, tawlet lamah khutze-in hepina a ngen hi:
Si Nading Sarah’ Thungetna
“Hepina a nei Pasien aw, thupha tawh na kidim hi!
A siengtho le a zatahhuoi na min tungah tawntung thupha om ta heh!
Na bawlsa zosie in hing phat ta vuheh.
12 Tu-in na tungah, Topa aw,
hing maingatin kang ento hi.
13 Tami leitung ei nuasiesah inlen
simmawnate ei thuosah ngai nawn sin.
14 Pasal tawh mawna khatpo panin mawpeng ka hi lam,
Topa aw, nang in na thei hi.
15 Ka saltanna leitang ah keima’ min le ka pa’ mindai nading
bangma ka sem ngai sih hi.
Kei pen ka pa’ ta khat neisun ka hi a,
ama in a gamh luo ding ta a nei siha,
A sanggam kinaipite pen le amahaw’ tate’ zi a ka op thei nadingin
hieng le san zong a nei sih hi.
Ka pasal sagite a si sieng zo ta hi.
Bangziehin nungtalai ding ka hei?
Ahi zongin, ka hinna lah ding na lunglam ahi sihle, Topa aw,
hepina le deihsahna tawh ei ensuh ta’n,
tua hile tua simmawnate ka thuo nawn sih ding hi.”
Thungetna’ Dawnna.
16 Khum hun laitahin, ama tegel’ thungetnate pen minthang Pasien’ opna ah kiza hi. 17 Tuaci’n ama ni damsah dingin Raphael kisawl hi: Tobit in a mit tawh Pasien’ khuovah a mu theikia nadinga a mit delkang mangsah ding; Raguel’ tanu Sarah pen Tobit’ tapa Tobiah tawh kitengsah ding, le dawi gilo Asmodeus hawlkhie dingin kisawl hi. Bangzieh ahei cile Tobiah le Sarah a kiten nading pen gelkholsa ahi hi.
Khum hun ma-in Tobit in a huong sung panin a inn lam a maingat laitah lienin, Raguel’ tanu Sarah zong inndan tungnung panin hing kumsuh lien hi.