III. KHUOLZIN DING KITHAWINA
Pa’ Thuhilna.
1 Khum ni ma-in Tobit in Media gam Rages khuo a Gabael kunga muonna tawh a koi a sum ang phaw hi. 2 Ama le ama kihoin, “Tu-in lah si nading ngen zo ta’ng, ka si masangin bangzieh a ka tapa Tobiah hlanin tam sum tawh kisai theisah lo ding ka hei?” a kici hi. 3 Tuaci’n ama in a tapa Tobiah hlan hi; ama hing pei ciengin, a kungah: “Ka ta aw, ka si ciengin a kilawmin ei vui in. Na nu zatah inlen, a hin laisie don loin om sin. Ama’ deilam bawl inlen, hlasiesah ngai sin. 4 Ka ta aw, a gil sunga na oplai-in ama in nang adingin zauhuoina tampi bang ci thuo ahei ci mangngil ngai sin. Ama a si ciengin, kei tawh kibangin hankhuh khat sungah hing vui in.
5 Na hin sung tawntungin, ka ta aw, Topa phaw zingin, mawna bawl sinlen, thukhamte palsan sin. Na hin sungin citahin gamta inlen, lampi hoi lote tawn ngai sin. 6 Bangzieh ahei cile thumanna tawh gamta-in, citahna a cingte in a sepna a bawlnate vuah mavang vuhi.
7 Na neisate sung panin piehkhietna nei in. Mi genthei khat poma elngat sin, tua hile Pasien’ mai in zong hing elngat lo ding hi. 8 Na neisa tawh kituohin piehkhietna nei in. Na tam nei leh, na tamneina dungzui-in tam pieh in; na tawm nei leh, na tawm pieh ding zau sin. 9 Cimawna na tuo ni ciengin nangma adingin nei le lam a khol na hi ding hi. 10 Bangzieh ahei cile piehkhietna in sina panin hing kipelsah thei a, Khuomiel sung lut theina panin hing lakhie thei hi. 11 Na hoi semte adingin piehkhietna pen Sang Penpa’ muna ah piehna kilawm mama khat ahi hi.
12 Leitung guolnopna namkim tungah, ka ta aw, pilvang in, tuale a thupi penin, na pu na pa’ innkuon sung panin na zi ding sui in. Na pa’ nam a hi lo, gamdang numei tenpi sin, bangzieh ahei cile eite pen thuman a gen masa kamsangte’ hlah le suonte ihi vuhi. Tanglai apatin i pu i pa Noah, Noah zaw cieng Abraham, Isaac, le Jacob-te in thugenkhol vuhi. Ka ta aw, mangngil ngai sin, amate zosie in a sanggamte sung panin zi a na sui vua, ta tampi nei-in thupha a sang vuhi, tuale a hlah le suonte in gam le lei a luo vuhi. 13 Tua ahi ziehin, ka ta aw, na sanggamte na it in. Amate lahah nangma adingin zi na sui nuom lona tawh na mite’ tanu le tapate ahi amahaw khatpo tungah kihisahna tawh gamta sin. Azieh pen kihisahna sungah sietna le dinkip-theilona lienpi om hi. Thadana sungah supna le zawnna lienpi om hi, bangzieh ahei cile thadana pen kieltunna’ tunnu ahi hi.
14 Na kunga na hing semte’ thaman a zing ni dong kem sinlen a sep ni ma-in pie pai in. Pasien na’ na sep leh na thaman na sang ding hi. Na sep na bawl zosie tungah, ka ta aw, pilvang in; na thugenna zosie ah pilvang inlen, na gamtatna zosie ah kikem in. 15 Na tunga a kibawl ding na dei lote nang in zong koima’ tungah bawl sin. Na kham dongin, ahi sihle khamna in ang peipi dongin, lenggazu val dawn sin.
16 A gilkielte nangma’ an pie inlen, guohtanga omte nangma’ puon pien in. Na vanzah valte zosie piehkhietna-in pie in; tuale na pieh vante it sin. 17 A citahte’ han tungah na anlum koi inlen a lenggazu sungsuh in, ahi zongin mawneite tawh na kitang sin.
18 Mipilte’n thu kihilsah inlen, thuhoi tapo simmaw sin. 19 A tawntungin Topa, na Pasien, phat inlen na lampi zosie a tan nading le na ngimna le na tupna zosie hing tangtunpi nading in ngen in. Bangzieh ahei cile pilna pen koima’ neisa ahi siha, na hoi zosie pen Topa’ piehsa ahi hi. Topa in a lapsang nuom tapo a kilamsang hi; tuale Topa in a ngiemsah nuom tapo Hades dong ciengah a ngiemsuh hi. Tuaci’n, ka ta aw, tam kang thupiehte na lungsim sungah ciemte inlen, mangngil ngai vawt sin.
20 Tu-in, ka ta aw, Media gam Rages khuo a Gabri’ tapa Gabael kunga muonna tawh ka koi dangka talent sawm tawh kisai kang gen ding hi. 21 I Zawn vangin, ka ta aw, zau sin. Pasien zau-in, mawna zosie pan kihemkhie-in, Topa na Pasien’ muna ah na hoi na sep nah poleh, na hau ding hi,” a ci hi.