IV. MEDIA AH TOBIAH’ KHUOLZINNA
Rages Peina Lamkal.
2 Tangvalpa in inn a nuasie ciengin, vantungmi in a oppi a, ui in Tobiah nuazui-in, ama tegel tawh a zaw ta hi. A Kuonkhie zo ta gela, a zan masa hing tungin, Tigris Gun gei ah giehphuol a sat gel hi. 3 A keng sil dingin Tigris Gun ah tangvalpa a peisuh ciengin, tui sung panin ngapi khat hing kipehkhie-in a keng hing valtum sawm hi. Gingin, ama a awng piehpuo hi. 4 Ahi vangin vantungmi in tangvalpa kungah, “A ngapi man inlen, gah cip dawh ven!” ci hi. Tua bepin ama’n a ngapi manin leitang satna’n a nei hi. 5 Tua ciengin vantungmi in a kungah: “A ngapi atin hongkhe dawh inlen, a sinkha, a lungtang, le a sin lakhie in; a gilpi paimang lel in. A sinkha, a lungtang, le a sin pen zatui-in kizang thei hi,” ci hi. 6 Tobiah in a ngapi atin a honkhe zo ciengin, a sinkha, a lungtang, le a sinte a tuom koi hi. Tua ciengin ama in a sa emin a ne hi; a valteng ci sawin, a lam an dingin a kem hi.
Raphael’ Thuhilna.
Tua zo ciengin ama ni in khuolzinna lampi tawnsuoin, Media hing nai ta gel hi. 7 Tua ciengin tangvalpa in vantungmi kungah: “Sanggampa Azariah aw, ngapi’ lungtang, a sin, le a sinkhate bang zatui a kizang thei ahei?” ci-in a dong hi. 8 Ama in: “Ngapi’ lungtang le a sin pen dawi le kau in a valtum mi khat’ mai ah halin khusah lacin a dampai dinga, tua minu tua mipa a kisubuoi nawn sih ding hi. 9 A sinkha ahile, mit delkang neite’ mit nupieh lacin, khuo a mukia pai ding hi,” ci’n a dawng hi.
10 Media sung lutin Ecbatana khuo hing nai cieng gelin, 11 Raphael in tangvalpa kungah, “Sanggampa Tobiah aw!” a ci hi. Ama in, “Tanah om ing!” ci’n a dawng hi. Raphael in zomin, “Na sanggam khat ahi Raguel’ innah tuzan i gieh ding hi. Ama in Sarah kici tanu melhoi khat a nei hi, 12 hizongle Sarah sim lo tanu dang tapa dang khat beh a nei sih hi. Nang pen Sarah adingin sanggam kinaipi pen na hi ziehin, ama na tenpi nadingin mi dangte sangin nangma’n thu na neizaw hi. Tua banah, a pa’ gamluoh ding pen nangma ma na hi bo hi. Tua nu pen pilin, lungsim khauhin, a mel hoi mama ahi hi; a pa pen a tanu it mama mi hoi khat ahi hi,” ci-in a gen hi. 13 A thugen zomin: “Ama tenpi theina thu nang in na nei hi. Tua ahi ziehin ka thugen mang in, sanggam aw. Na zi a ama i lah thei nadingin, tuzan ciengin keima’n a pa kang hopi ding hi. Rages pan i kilekia ciengin, ama adingin mopawi i bawl ding hi. Raguel in a tanu pen midang a pieh thei lo lam, le nanga dingin a phal-maw thei lo lam ka thei hi; phal sih leh, ama in Moses Laibu sunga kigiel sa ma bangin sina-dan a thuo ding hi. Bangzieh ahei cile nang in ama’ tanu tenpi theina thu na neilam ama in a thei hi. Tu-in na ngai in, sanggam aw; tuzan ciengin tam nu tawh kisai i gen ding hi, tua hile ama pen nang adingin khamna i nei thei ding hi. Rages pan i kilekia ciengin, ama tawh zawin, na innah ama i tut ding hi,” ci hi.
14 Ahi vangin Tobiah in Raphael kungah, “Sanggampa Azariah aw, ama pen pasal sagi kungah a motha sa hi-in, mopawi bawlna lupna inndan sungah a pasalte a ban si paipai vuhi ci thu ka za ngai hi. A luppi ding zan ciengin, amahaw si hi. Tuale amahaw a that pen dawi gilo hi ci thu zong ka za hi. 15 Tuaci’n tu-in tami dawi gingin ka zau hi, bangzieh ahei cile ama in tua nu ngai-in bangma a law sih hi; hizongle tua nu a neh sawm pasal poma ama’n a that hi. Kei pen ka pa’ ta khat neisun ka hi hi. Tu-in ka si kha dinga, kei vanga a da a kaa zieh gelin, ka tun le zuo’ nuntatna hanmuol ah ka tut kha ding zong ka zau hi; ama tegel in ama ni vui dingin tadang khat beh a nei sih gel hi!” ci-in a dawng hi.
16 Raphael in a kungah: “Na pa’ hing thupieh na mangngil ta amah? Ama in na pu na pa’ innkuon sung numei na tenpi dingin thu hing pie hi. Tu-in ei mang in, sanggam aw; tuami dawi gingin zau sin. Sarah kilah in. Tuzan ciengin ama pen nangma’ zi dingin ang kiap nading thu ka thei hi!” a ci hi. 17 Mopawi bawlna lupna inndan sungah na lut ciengin, ngapi’ sin le a lungtang tawi inlen, gimnamtui vut sungah khie in, tuale a khu gimnam ang kiviel ding hi. 18 A dawi gilo in tuami gimnam ang nap kha lien ciengin, ang kihemmang dinga, tua nu’ kim ah zong ang kitha nawn sih ding hi. Tuale lumtonin ama tawh na maw masangin, thungen dingin tho masa phot gel in. Hepina le kepna na nga na dingin vantung Topa kungah kiko gel in. Zau sin, bangzieh ahei cile leitung a pien masang apatin ama pen nang adinga na kitelsa ahi hi. Nang in ama na hon dinga, nang tawh ama a zaw ding hi. Tuale ama’ tung panin ta nei va teh ci’n ka muonga, amahaw pen nang adingin na sanggamte a bang ding hi. Tua ahi ziehin zau sin,” ci hi.
Tobiah in Raphael’ kammalte pan tua nu pen a pu a pa’ innkuon sung pan hi-in, ama’ sanggamnu khat ahi lam ang thei ciengin, tua nu hing it mamain, nahpitahin hing lunggul hi.