V. KITENNA LE SARAH’ DAMNA
Raguel’ Innah.
1 Ecbatana a tun cieng gelin, Tobiah in, “Sanggampa Azariah aw, i sanggampa’ innah tung suoh pai vai,” ci hi. Tuaci’n ama in a zawpi suoh hi, tuale a innah hing tungin, a innhuong tunkot gei ah Raguel a to a mu gel hi. Ama ni in hopi masain, ama in, “Na tung gelah muohna tampi om ta heh, sanggamte aw! Hing muoh ing! Damin na hing tung gel hi! Damin hing lut ta gel in!” ci’n a thuh hi. Tuale a innsungah ama ni a tumpi ta hi. 2 Ama in a zi Edna kungah, “Tam tangvalpa in ka pano’ tapa Tobit a sun hi!” ci hi. 3 Tuaci’n Edna in ama gel kungah, “Hei pan na hiei, sangam tegel?” ci-in a dong hi. Ama tegel in, “Tu-in Nineveh ah saltang, Naphtali’ hlah le suonte ka hi gel hi,” ci’n dawng hi. 4 Ama in a kung gelah, “Ka sanggampa vuh Tobit na thei kha vuoi?” ci hi. Ama ni in, “Ama thei ma vung,” ci-in a dawng kia hi. Ama in, “A damdam na ei mah?” ci-n a dong hi. 5 Ama ni in, “A damdam lai ma hi,” ci’n dawng hi. Tua ciengin Tobiah in, “Ama pen ka pa ahi hi!” a ci hi. 6 Raguel kitomin, ama namin, tuale ama hlitui tawh a kiteh ta hi. 7 Tua ciengin ama in, “Na tungah thupha om ta heh, ka ta aw! Nang pen mi thupi le mi hoi zuopa’ tapa khat na hi hi. Tam bang mi cihtah le piehkhietna nei khat in bangzieha a mittaw thei valang a diei!” ci-in a gen hi. Ama in a sanggampa Tobiah kawi-in, a kapkia hi. 8 Tobit dapi-in a zi Edna zong a kap hi; tuale a tanu vuh Sarah zong a kap hi.
Tobiah le Sarah’ Kitenna.
9 Tua zo ciengin, Raguel in a gankhawite lah pan tuutal khat a goin, thupi tahin zin a do hi. Ama ni kisilin, a kiheizaw, a ne a dawn dingin a tosuh ciengvun, Tobiah in Raphel kungah, “Sangampa Azariah aw, ka sanggamnu Sarah ei pieh nadingin Raguel kungah ngen ta in,” a ci hi. 10 Raguel in a na dapzah hi; tuaci’n ama in tangvalpa kungah: “Tu nitahin ne-in, dawnin, nuomsa vun, azieh pen, sanggampa aw, ka tanu Sarah tenpi theina thu nei nang longal koima a om sih hi. Tua tham loleh, nang loin, midang tungah ama piehtheina thu zong ka nei sih hi, bangzieh ahei cile nang in ka sanggam kinaipi pen na hi hi. Ahi zongin, ka ta aw, siengtahin thuman kang gen ding hi. 11 I sanggamte veve, pasal sagi kungah ama ka mothasah zo ta a, amahaw in ama a luppi ding zan ciengin a ban si vuhi. Hingzongle tu-in, ka ta aw, ne-in dawn phot in,” a ci hi. Tobiah in, “Tam tawh kisai-in khensatna na nei sihle, tam muna kiluite khat beh ne-in ka dawn sih ding hi,” ci hi.
Raguel in a kungah: “Hing vaihawm vang ei. Moses Laibu’ thupieh ma bangin ama pen nangma a ahi hi. Ama tawh na kiten nading thu vantunga kikhen-sansa ahi hi! Na sanggamnu kilah ta in; tu akipanin nang pen ama’ sanggampa na hi a, ama pen na sanggamnu ahi ta hi. Tu akipan a tawntungin ama pen nang adinga ang kipe ahi ta hi. Tu nitahin vantung Topa in khantona hing pie hinlen, na tung gelah hepina le kilemna hing pie ta heh,” a ci hi. 12 Tua ciengin Raguel in a tanu Sarah hlanin, a kungah ama hing pie hi. Ama in a khutah tu in, Tobiah kungah: “Thukham tawh kizui-in ama kilah ta in. Moses Laibu sungah a kigiel ma bangin, na zi dingin ama kang pie hi. La inlen, na zuopa kungah dam-le-bihin tunpi in. Tuale van Pasien in cingin hing kemin, na tung gelah kilemnaa hing tungsah ta heh!” ci-in a ap hi. 13 Tua ciengin ama in Sarah’ nu hlanin, laigielna vante hing tawi ta’n ci’n a gen hi. Ama in kitenna lai bawlin, a tungah Moses thukham gen bangin, Tobiah’ zi dingin Sarah a piehna thu a giel hi. Sarah’ nu in a vante hing tawi-in, tua kiciemna lai tungah a thukimna suoib a kai hi. 14 Tua zo ciengin ne-in a dawn ta vuhi. 15 Baakhat zaw ciengin Raguel in a zi Edna hlanin a kungah, “Ka sanggamnu aw, lupna inndan khat pen siem ta inlen, tua munah Sarah zawpi ta in,” a ci hi. 16 Pei-in, a gen ma bangin, ama in tua inndan sungah lupna siemin Sarah a zawpi ta hi. Ama in Sarah a kaalu zaw ciengin, hlitui nulin a kungah, 17 “Na lungsim khauhsah in, ka ta aw! Vantung Topa in lungkham-sinkhamna munah lungdamna hi piezaw ta heh! Hang in, ka ta aw!” ci hi. Tua zoin ama a pusuo ta hi.